قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپارباەۆ 25 ماۋسىم كۇنى جۇمىس ساپارىمەن اقمولا وبلىسىنىڭ ەسىل جانە جارقايىڭ اۋداندارىندا بولدى.
ۆيتسە-پرەمەر, ەڭ الدىمەن, اقمولا وبلىسىنىڭ اكىمى سەرگەي كۋلاگيننىڭ باستاۋىمەن كراسنوگور اۋىلدىق وكرۋگىندەگى كالاچي ەلدى مەكەنىندە بولىپ, ۇيقى سيندرومى ورىن العان اۋىلدىڭ بۇگىنگى تىنىس-تىرشىلىگىنە كوڭىل ءبولدى. وسىعان بايلانىستى بەردىبەك ماشبەك ۇلى كالاچي ورتا مەكتەبىندە اۋىل تۇرعىندارىمەن كەزدەسۋ وتكىزدى.
رەسپۋبليكالىق جۇمىس توبىنىڭ وكىلدەرى, مۇددەلەس مينيسترلىكتەر مەن وبلىستىق ۆەدومستۆولاردىڭ باسشىلارى قاتىسقان جيىندا اقمولا وبلىسى اكىمىنىڭ ءبىرىنشى ورىنباسارى قادىرحان وتاروۆ كەڭەيتىلگەن حابارلاما جاسادى. ونىڭ ايتۋىنشا, ۇيقى سيندرومى كورىنىس بەرگەن 2013 جىلدان بەرى وسىنداي 170 وقيعا تىركەلىپ, 133 ادام دارىگەرلىك كومەككە جۇگىنگەن. جەرگىلىكتى دارىگەرلىك امبۋلاتوريادا تاۋلىك بويى جۇمىس ىستەيتىن, 10 توسەكتىك ەكى پالاتا جابدىقتالدى. ول ەسىل اۋداندىق اۋرۋحاناسىنىڭ دارىگەرلىك-مەدبيكەلىك بريگاداسىمەن نىعايتىلىپتى. كالاچيدىڭ ءاربىر تۇرعىنى مەديتسينالىق بايقاۋدان وتكىزىلىپ, ولاردىڭ دەنساۋلىعى تۋرالى جەكە پاسپورتى مەن الەۋمەتتىك كارتاسى رەسىمدەلگەن.
2015 جىلعى 1 ماۋسىمداعى ءمالىمەت بويىنشا, كالاچي اۋىلىندا 532 ادام تۇرسا, ونىڭ 283-ءى ەڭبەك قابىلەتىندەگى, 130-ى زەينەتكەر, 15-ءى مۇگەدەك, 73-ءى وقۋشى, 26-سى مەكتەپ جاسىنا دەيىنگى بالالار جانە بەسەۋى ستۋدەنت ەكەن. سونداي-اق, الەۋمەتتىك كارتانى دايىنداۋ بارىسىندا تۇرعىنداردىڭ 15 پايىزى كالاچيدە تىركەلمەگەنى, 30 پايىزىنىڭ تۇرعىن ءۇي مەن جىلجىمالى م ۇلىككە قۇقىقتىق قامتاماسىز ەتۋ قۇجاتتارىنىڭ جوقتىعى انىقتالعان. وكىلەتتى ورگاندار بۇل ماسەلە بويىنشا قوسىمشا جۇمىستار جۇرگىزىپ جاتقانى ايتىلدى.
ورىن العان جاعدايعا بايلانىستى اقمولا وبلىسىنىڭ اكىمدىگى كالاچي مەن كراسنوگور تۇرعىندارىن وبلىستىڭ ەسىل جانە دەرجاۆين قالالارىنا, وزگە دە اۋىلدىق وكرۋگتەرىنە قونىستاندىرۋ تۋرالى شەشىم قابىلداعان. بۇل جونىندە ارنايى جۇمىس توبى كالاچي مەن ىرگەلەس كراسنوگور كەنتىنىڭ ءاربىر تۇرعىنىمەن ەرىكتى سۇراۋ سالۋ اڭگىمەسىن وتكىزىپ, كوشى-قون ماسەلەسىنە قاتىستى ءتۇسىنىك جۇمىستارى جۇرگىزىلدى. ءناتيجەسىندە, 2015 جىلعى 19 ماۋسىمعا دەيىن 65 وتباسى (176 ادام, 54 بالا) باسقا ەلدى مەكەندەرگە قونىس اۋدارىپتى. بۇعان قوسىمشا, «جۇمىسپەن قامتۋدىڭ جول كارتاسى-2020» باعدارلاماسىمەن تۇرعىن ءۇي سالۋعا بيۋدجەتتەن 2 ميلليارد تەڭگە قارجى قاراستىرىلىپ وتىر. قازىرگى ۋاقىتتا ەسىل قالاسىندا 118 پاتەرلىك ەكى ءۇيدىڭ قۇرىلىسى, جارقايىڭ اۋدانىنىڭ ورتالىعى دەرجاۆين قالاسىندا 75 پاتەرلىك تۇرعىن ءۇيدىڭ قايتا قۇرىلىسى جوباسى جۇزەگە اسىرىلۋدا. ەسىلدەگى ۇيلەرگە 101 وتباسى (جوسپارلانعانى 118 پاتەر) قونىستانۋعا تىلەك ءبىلدىرىپ وتىر. كالاچي جانە كراسنوگور كەنتىندەگى تاعى دا 165 وتباسى مۇشەلەرىن دەرجاۆين قالاسىنداعى 75 پاتەرلىك ۇيگە كوشىرۋ جونىندەگى ماسەلە قاراستىرىلۋدا. جالپى, اتالعان ەلدى مەكەندەردىڭ تۇرعىندارىن كوشىرۋ مەن مەديتسينالىق قامتاماسىز ەتۋ وبلىس اكىمدىگى تاراپىنان ايرىقشا باقىلاۋدا ۇستالۋدا.
جينالىستا اۋىل تۇرعىندارى ۆيكتور كريۋكوۆ, ليۋبوۆ گوۆدي, ۆيكتور لۋكيانەنكو, ۆەرا پرىتيكا جانە ۇلتتىق رادياتسيا ينستيتۋتىنىڭ ديرەكتورى سەرگەي لۋكاشەنكو ءسوز الىپ, كوشى-قون, تۇرعىن ءۇي مەن جىلجىمايتىن م ۇلىكتى زاڭداستىرۋ, عىلىمي تالدامالاردىڭ بارىسى تۋرالى پىكىرلەرىن ءبىلدىردى. سونداي-اق, رەسپۋبليكالىق جۇمىسشى توبىنىڭ جەتەكشىسى, ەنەرگەتيكا ءمينيسترىنىڭ ورىنباسارى تالعات اقسالبيەۆتىڭ اتقارعان جۇمىستارى تۋرالى ەسەبى تىڭدالدى.
ۆيتسە-پرەمەر مەن وبلىس اكىمى كەزدەسۋگە قاتىسۋشىلاردىڭ كوپتەگەن سۇراقتارىنا جاۋاپ قايتاردى. بەردىبەك ساپارباەۆ جۋرناليستەرگە بەرگەن سۇحباتىندا اۋىل تۇرعىندارى مەن بالالاردىڭ دەنساۋلىعى ءبارىنەن بيىك تۇراتىندىعىن, ۇيقى سيندرومىنىڭ تولىقتاي انىقتالماعىنىن ەسكەرە وتىرىپ, ولاردى وبلىس اكىمدىگى بەلگىلەگەن ەلدى مەكەندەرگە كوشىرۋ, جۇمىسپەن جانە الەۋمەتتىك ۇسىنىمدارمەن قامتاماسىز ەتۋ قاجەتتىگىن اتاپ ءوتتى. ەلباسى تاپسىرماسىنا سايكەس, ۇكىمەت بۇل ماقساتتارعا قازىردىڭ وزىندە 1,5 ميلليارد تەڭگە ءبولىپ وتىر. قالعان قارجى كوزدەرى دە قاراستىرىلۋدا. سونىمەن بىرگە, ول كوشىرىلگەندەردى قابىلداپ, ءتيىستى جاعداي جاساپ وتىرعان شارۋاشىلىق باسشىلارى مەن جەرگىلىكتى بيلىك وكىلدەرىنە العىسىن ءبىلدىردى.
ۇكىمەت باسشىسىنىڭ ورىنباسارى ساپار بارىسىندا ەسىل جانە دەرجاۆين قالالارىندا كالاچي مەن كراسنوگور تۇرعىندارىنا ارنالىپ سالىنىپ جاتقان تۇرعىن ءۇي قۇرىلىستارىندا, باسقا دا نىسانداردا بولىپ, الەۋمەتتىك سالا قىزمەتكەرلەرىمەن ءماجىلىس وتكىزدى.
باقبەرگەن امالبەك,
«ەگەمەن قازاقستان».
اقمولا وبلىسى.